Brottför frá Íslandi

Flogið til Parísar með Icelandair kl. 07:45 og lent þar kl. 13:10 að staðartíma. Haldið áfram til Doha með Quatar Airways kl. 16:25 og lent þar kl. 23:50.  Þaðan verður svo flogið til Katmandú kl. 01:15 eftir miðnætti og lent þar kl. 08:40 að morgni 10. apríl.

Komið til Katmandú

Staðarleiðsögumaður tekur á móti fararstjóra og ferðalöngum á flugvell­in­um í Katmandú og fylgir okkur að rútu sem ekur hópnum fyrst á Patan Durbar torg (20 til 25 mín. akstur). Durbar-torg er hjarta Katmandú og fjölsóttur ferðamannastaður. Þar er einstök þyrping af fornum musterum, talin allt að fimmtíu, hallarbyggingum, hallargörðum og gömlum stræt­um. Sjón er sögu ríkari. – Eftir að hafa skoðað okkur um á Patan Durbar torgi verður ekið til heimilis hr. Mishra, Kupondole, þar sem við snæðum ljúffengan hádegisverð. Hr. Mishra er eigandi Tempel Tiger sem annast alla þjónustu fyrir Kólumbus í þessari ferð. Eftir hádegisverðinn er haldið út úr borginni og ekin 16 km leið (um 50 mín. akstur) til hins yndisfagra dvalarstaðar okkar hjá Katmandu, The Terraces Resort & Spa í Lakuri Bhanjyang sem er 5* lúxus hótel í fjallasal Himalæja fjalla en þarna verður gist fyrstu 2 næturnar.  Þegar komið er í dvalarstað er tekið á móti okkur með hressingu og kynnt fyrir okkur hvað er í boði á staðnum. Að því búnu fá ferðalangar lykla að herbergum sínum. Kvöldverður. 

Máltíðir innifaldar: Hádegis- og kvöldverður.

Frjáls dagur í Lakuri Bhanjyang

Njótið sólarupprásar (ef veður leyfir) og snæðið morgunverð á hótelinu. Verjið svo deginum eins og hverjum hentar. Hádegis- og kvöldverður á The Terraces Resort & Spa. 

Máltíðir innifaldar: Morgun-, hádegis- og kvöldverður. 

Pashupatinath-hofið og Boudhnath stúpan 

Við kveðjum Lakuri Bhanjyang og eftir komuna til Katmandú verður haldið að Pashupatinath-hofinu sem er eitt helgasta hof Hindúa og stendur við bakka árinnar Bagmati. Hofið er frægt fyrir ađ vera stærsta útfararhof Hindúa í Nepal, ekki þak og silfurhúðaðar hurðir, er á Menningarminjaskrá UNESCO. Að lokinni skoðunarferð um hofið er haldið til Boudhnath stúpunnar. Boudhnath-stúpan er að öllum líkindum stærsta stúpa í heimi og mikill helgistaður á meðal búddahtrú­armanna. Kringum stúpuna hafa risið nokkur klaustur, þar sem dveljast munkar af ólíkum greinum tíbetskrar búddhatrúar, og í einu þeirra (við vesturhlið stúpunnar) er griðarstór, skreytt stytta af sitjandi Búddha, Maitreya Buddha.

Við snæðum hádegisverð á veitingastað  í grenndinni og að því búnu verður ekið á hótelið í Katmandú. Síðdegis heimsækjum við Swayam­bhunath stúpuna í Katmandú-dal. Þar blasir við gullin spíra á keilulaga, skógi vaxinni hæð, stúpa sem talin er elsti og dular­fyllsti helgistaðurinn í Katmandú-dal. Af steinristum, sem fundist hafa á staðnum, má ráða að stúpan var orðin mikilvægur áfangastaður búdd­ískra pílagríma á 5. öld.

Síðdegis verður haldið á Hotel Hyatt Place 5* í Katmandú þar sem dvalið verður næstu 3 nætur.

Um kvöldið förum við á veitingastað í grennd við hótelið þar sem við snæðum hefðbundinn nepalskan kvöldverð og í boði er menningar­dagskrá með þjóðlegu sniði.

Máltíðir innifaldar: Morgun-, hádegis- og kvöldverður.

Dagsferð um Katmandú-dal

Eftir morgunverð á hótelinu verið ekið til bæjarins Bhaktapur, staðar sem er á Menningarminjaskrá UNESCO. Bhaktapur, sem er í 15 km fjarlægð frá Katmandú, liggur í 1400 m hæð yfir sjávarmáli. Í borginni, sem rekur sögu sína allt aftur til 9. aldar, má sjá fjölda merkra hluta sem allir eru við langa göngugötu í miðborginni. Við snæðum hádegisverð á veitingastað í Bhaktapur og þá er tilvalið að bragða á jógúrtinu, sem framleitt er í bænum, „Juhu Dhau“, og þykir einstaklega gott. Eftir hádegisverð ökum við aftur inn í Katmandú til að skoða okkur um á Durbar torgi. Katmandú var aðsetur nepölsku konungsættarinnar fram á 20. öld og miðborgin, Durbar-torg og strætin þar í kring, iðar af mann­lífi. Njótið andrúmsloftsins á þessu einstaka svæði og bygginganna, hofa, mustera og halla sem gleðja augað. Röltið niður hliðar­stræti og um Thamel-hverfið, hjarta borgarinnar þar sem er urmull af verslunum, sölubásum, veitingastöðum og krám. Þegar líður nær kvöldi njótum við þess að snæða kvöldverð á Kaiser Cafe sem er í hinum friðsæla og fallega „Draumagarði“ í miðborginni. Eftir kvöldverð verður svo haldið aftur á hótelið.

Máltíðir innifaldar: Morgun-, hádegis og kvöldverður. 

Neydo klaustur og Kirtipur

Eftir morgunverð höldum við í skoðunarferð til Neydo klaustursins og Kirtipur. Neydo Tashi Choeling klaustrið, í um klukkustundar­akstur frá Katmandú, er nýgræðingur í klaustur­heimi Nepalbúa, sjálf klausturbygg­ingin var reist árið 2006 en klaustrið sjálft tók til starfa nokkrum árum fyrr. Í klaustrinu búa og starfa um 200 munkar. Klaustrið er á hrífandi fallegum stað og þar má sjá stærstu styttuna af Amitabha Búddha. Eftir viðdvöl í klaustrinu höldum við til Kirtipur, eins af elstu bæjunum í Nepal, í um 5 km suðvestur af Katmandú. Nafnið á bænum er runnið frá sanskrít, „kirti“ merkir „dýrð“ og „pur“ merkir bær. Bærinn á sér aldagamlar rætur og þar eru margir sögulegir helgistaðir sem vert er að heimsækja og njóta. Snæddur verður hefðbundinn hádegisverður í Kirtipur. – Þegar við höfum skoðað nægju okkar í Kirtipur verðu ekið aftur til Katmandú. Það sem eftir lifir dagsins er hverjun og einum frjálst að gera það sem hann lystir. – Kvöldverður á hótelinu. 

Máltíðir innifaldar: Morgun-, hádegis- og kvöldverður.

Flogið frá Katmandú til Paró í Bútan og ekið þaðan til Timfú

Morgunverður á hótelinu í Katmandú. Að því búnu er haldið út á flugvöll og flogið til bæjarins Paró í Bútan. Flugleiðin liggur yfir stórbrotið fjalllendi og opnast sýn til hæstu tinda í Himalæjafjallgarð­inum, Everest, Kanchen­junga og Makalu. Þegar nær dregur áfangastað, Paró, birtast snævi­þaktir tindar í Bútan, hinn helgi Jhomolhari, Jichu Drake og Tserimgang. – Staðarleiðsögumaður tekur á móti farþegum á flugvellinum í Paró og þaðan er ekið eftir fallegri leið til höfuðborgar Bútan, Timfú. – Innritun á hótelið þegar komið er til Timfú. – Timfú, höfuð­borg Bútans og aðsetur stjórnvalda og miðstöð trúariðk­unar og viðskiptalífs, er einstök borg þar sem mætast nútími og fornar hefðir. Trúlega er þetta eina höfuðborg í veröldinni þar sem eru ekki umferðarljós. – Eftir kom­una á hótelið er dagurinn frjáls en má mæla með gönguferð um þessa líflegu borg. Ef tími gefst til er vel þess virði að heimsækja Trashicho Dzong-virkið þar sem er hásætissalur konungs og ýmis ráðuneyti og stjórnarskrifstofur. – Hádegis- og kvöldverður á veitingastað í borginni.

Gist í Timfú. 

Máltíðir innifaldar: Morgun-, hádegis- og kvöldverður.

Timfúdalur

Eftir morgunverð á hótelinu notum við daginn til þess að skoða okkur um í Timfú og í Timfúdal. Við heimsækjum m.a. eftirtalda staði:

Eftir morgunverð á hótelinu notum við daginn til þess að skoða okkur um í Timfú og í Timfúdal. Við heimsækjum m.a. eftirtalda staði:

Buddha Dordenma, 51,5 metra há Búddhastytta á hæð með einstöku útsýni yfir höfuðborgina.

Gagyel Lhundrup vefnaðarsetrið, víðfrægt vefnaðarsetur sem er í eigu og undir stjórn karlmanns sem er óvenjulegt í Bútan.

Minningarstúpan Chorten, minnismerki helgað heimsfriði og Jigme Dorji Wangchuck, konungi, sem nefndur er „faðir hins nýja Bútans“.

Changangkha Lhakhang, eitt af hinum æfagömlu musterum í Timfú, Úr klausturgarðinum er hrífandi útsýni yfir Timfúdalinn.

 Zorig Chusum, lista- og handiðnaskóli sem býður sex ára nám í 13 hefðbundnum lista- og handiðnagreinum.

Veflistasafnið, sett á stofn árið 2001.

Aldargamli bændamarkaðurinn, líflegur og litríkur staður þar sem bændur víðsvegar af landinu selja afurðir sínar.

Kvöldið er frjálst og ferðalöngum gefst tækifæri til að skoða t.d. versl­unarmiðstöð með handiðnavörur, sem rekin er af ríkinu, og markað bæjarbúa með hvers konar handiðnavörur frá heimamönnum.

Hádegisverður og kvöldverður á veitingastöðum þar sem leið okkar liggur. Gist í Timfú.

Máltíðir innifaldar: Morgun-, hádegis- og kvöldverður.

Ekið frá Timfú til Paró

Eftir morgunverð er ekið til Paró. Á leiðinni er höfð viðdvöl í Simtokha Dzong, eitt af elstu klausturvirkjunum í Bútan. Í klausturvirkinu er nú rekinn skóli og fræðasetur, helgað þjóðtungu Bútana, dzngkha. Ferð­inni er svo haldið áfram og komið í Paródal, fallegan dal sem umlykur blóm­lega menningu og þar sem ótal helgisagnir og þjóðsögur eiga sér rætur. Í dalnum eru mörg af elstu musterum og klaustrum í Bútan og þar er eini flugvöllurinn í landinu. Tindurinn Jhomolhari (7.300 m) gnæfir í snævi þaktri dýrð sinni yfir dalbotninum í norðri og frá honum, í djúpu gljúfri, streymir jökul­fljótið Pa Chu (Paró-fljót). Í Paró-dal er eitthvert frjósam­asta ræktarland í Bútan og þar er ræktað á stallaökrum megnið af hinum frægu rauðu hrísgrjónum frá Bútan. – Eftir innritun á hótelið í Paró heim­sækjum við Ta Dzong, sem var upphaflega reist sem varðturn en hýsir nú Þjóðminjasafnið. Eftir heimsókn á safnið er tilvalið að staldra við í Rinpung Dzong, „virki skargripahrúgunnar“, stað sem á sér langa og heillandi sögu. Þá er vel þess virði að líta inn í Kyichu Lhakhang, eitt af elstu musterum í Bútan. – Þegar degi hallar er hægt að líta inn á bóndabæ og drekka með fjölskyldunni hið hefðbundna smjörte. Hádegis- og kvöldverður á veitingastöðum í Paródal og Paró. Gist í Paró.

Máltíðir innifaldar: Morgun-, hádegis- og kvöldverður.

Tígrishreiðrið – eða – Chele la (skarð) 

Tígrishreiðrið – Taktsang

Tígrishreiðrið, frægasta búddhaklaustrið í Bútan, er á stórbrotnum stað, svo ekki sé fastar að orði kveðið, þar sem það stendur utan í hamra­vegg 900 metrum ofan við dalbotninn. Sagan segir að á 8. öld hafi Gúrú Rin­poche flogið á baki tígrislæðu frá austanverðu Bútan á þennan stað þar sem hann hugleiddi í helli í þrjá mánuði. Þess vegna er klaustrið nefnt „Tígrishreiðrið“. Höfuðmusterið í klaustrinu var reist árið 1692. Aðal­byggingin skemmdist illa í eldi árið 1998 en eftir endursmíði og um­bætur í mörg ár stendur klaustrið nú endurgert í allri sinni dýrð.

Pílagrímsferð til Taktsang er draumur allra heittrúaðra Bútana.

Hægt er að leigja smáhesta (viðbótargjald) sem bera ferðalanga frá dalbotninum til svæðis sem nefnt er annað útsýnissvæðið. Þröngur stígurinn ofan við þetta svæði hentar ekki fyrir smáhesta en efsti hluti stígsins eru steinsteyptar tröppur. Gangan frá öðru útsýnissvæði til musterisins tekur um hálfa til eina klukkustund. Ferðalangar verða að ganga alla leiðina niður frá klaustrinu (smáhestar eru ekki til reiðu á niðurleiðinni).

Hádegis- og kvöldverðir á veitingastöðum á leiðinni og í Paró. Gist í Paró.

Máltíðir innifaldar: Morgun-, hádegis- og kvöldverður.

Flogið frá Paró til Katmandú
Skoðunarferð til Bungamati og Khokana

Eftir morgunverð á hótelinu í Paró er ekið á alþjóðaflugvöllinn í Paró og flogið þaðan til Katmandú. Eftir að komð er til Katmandú er haldið í skoð­unarferð til þorpsins Bungamati í Lalitpur-héraði, smábæjar rétt hjá Bagmati-fljóti. Bungamati er heimabæ guðsins Machhindranath sem litið er á sem verndara dalsins. Í musterinu í þorpinu miðju dvelur lík­neski af guðinum í hálft ár en síðan dvelur guðinn eða líkneski hans í Patan í annað hálft ár.

Árlega og í heilan mánuð er haldin ein mikil­vægasta trúarhátíð í dalnum þegar lík­neski guðsins er flutt á milli Bungamati og Patan. Khokana er lítið, hefðbundið Newari-þorp um 8 km suður af Katmandú. Þorpið er fyrst og fremst þekkt fyrir sinnepsolíu þar sem þar hefur verið framleidd frá alda öðli. Lagt hefur verið til að Khokana verði tekið á menningarminjaskrá UNESCO. Heimsókn í þorpið er ferð aftur í tímann þar sem gamlar hefðir setja mark sitt á allt mannlíf og þar er hrífandi fallegt þriggja hæða musteri.

Hádegisverður á veitingastað í skoðunarferðinni.

Haldið heim á leið 

Síðdegis mun staðarleiðsögumaður hópsins fyglja ferðalöngum á alþjóðaflugvöllinn í Katmandú þar sem brottfor flugs Qatar Airways til Doha er áætluð kl. 18:00. Lent er í Doha kl. 20:15 að staðartíma og síðan flogið áfram til Osló kl. 01:55 aðfararnótt 20. apríl. Þar verður svo lent kl. 07:40 að morgni næsta dags. Loks er ferðast með Icelandair frá Osló kl. 13:50 og lent í Keflavík kl. 14:45.

Máltíðir innifaldar: Morgunverður.