Brottför frá Íslandi til Munchen

Flogið er með Icelandair FI532 kl. 07:20 til Munchen. Rúta bíður hópsins og farið er í 4 klst langa skoðunarferð um borgina með áherslu á upphaf ferils Adolfs Hitler sem hélt þar fyrstu ræðu sína árið 1919, árið sem Weimar lýðveldið var stofnað eftir lok fyrri heimstyrjaldarinnar.

Að lokinni skoðunarferð er innritun á Hotel Europa 4* hótel þar sem gist verður í tvær nætur. Kvöldverður er á hinu þekkta Hofbräuhaus veitinga og brugghúsi í hjarta borgarinnar.

Eagle’s Nest, Arnarhreiðrið og Salzburg

Dagsferð í Eagle’s Nest, Arnarhreiðrið og til Salzburg. Kehlsteinhaus eins og húsið var einnig nefnt er bygging sem Nasistar hönnuðu og reistu foringjanum til heiðurs fyrir fimmtugs afmæli hans í apríl 1939 á tindi Kehlstein, klettafjalls sem rís yfir Obersalzberg nálægt bænum Berchtesgaden. 

Að lokinni skoðunarferð er haldið til Salzburg og í skoðunarferð með leiðsögn um borgina. Þar er snæddur kvöldverður á leiðinni til baka til Munchen.

Dachau fangabúðirnar og Memorial Concentration Camp safnið.

Eftir morgunverð er útskráning af hótelinu og haldið af stað til Nürnberg með viðkomu í bænum Dachau þar sem fangabúðirnar og safnið er skoðað, Memorial Concentration Camp.

Búðirnar eru meðal fyrstu fangabúða sem Nazistar settu af stað, opnaðar í mars 1933. Þeim var upphaflega ætlað að vista pólitíska andstæðinga Hitlers en urðu síðar að stórum vinnu og útrýmingarbúðum með allt að 100 hliðar búðum á miklu landsvæði. Að heimsókn lokinni er ekið til Nürnberg og innritað á Hotel NH Collection Nürnberg 4* þar sem gist verður í tvær nætur. Kvöldið er frjálst.

Nürnberg Nazi Party Rallyground

Eftir morgunverð er lagt af stað í heilsdags skoðunarferð um Nürnberg og meðal annars staðnæmst á leikvangi Nasistaflokksins, Nürnberg Nazi Party Rallyground þar sem Nazistar héldu miklar hátíðir og Adolf Hitler þjóðernis og stríðs hvatninga ræður. Nürnberg skipaði sérstakan sess í viðburðum og áróðri Nazista. Farið er í réttarsalinn Nürnberger Trial Chamber og safn, þar sem helstu foringjar og áhrifamenn þriðja ríkisins hlutu dóma eftir stríðslok.

Komið á hótel og kvöldið er frjálst. 

Mödlareuth

Morgunverður og útskráning af hótelinu og haldið af stað til Berlínar. Á leiðinni er staðnæmst í bænum Mödlareuth þar sem hópnum er skipt upp í tvo hluta og farið í leiðsagða skoðunarferð um safnið. Bænum var eins og Berlín skipt upp í tvo hluta á tímum kalda stríðsins og Alþýðulýðveldisins og var hann því oft kallaður Litla Berlín. Komið er til Berlínar síðdegis og hópurinn innskráir á Park Inn 4* hótel þar sem gist er í 3 nætur. 

Berlín

Að loknum morgunverði er farið í heils dags skoðunarferð um Berlín. Í ferðinni er Reichtstag ríkis þinghúsið, Hitlers Bunker, neðanjarðarbyrgi Hitlers og Bundeswehr War Museum, þýska herminjasafnið skoðað. Höfuðborgin Berlín var vettvangur valdatöku Nazista 30. janúar 1933 og falls þriðja ríkisins eftir orustuna um Berlín í apríl og fram til 2. maí 1945. Þar endaði foringinn einnig ævi sína rúmum aldarfjórðungi eftir fyrstu ræðu sína í Munchen og þriðja ríkið var fallið.  

DDR safnið og sigling um Berlín

Frjáls dagur í Berlín þar til síðdegis en þá verður haldið á DDR safnið, safn um Alþýðulýðveldi austur þýskalands sem segir mikla sögu um tíma tvískiptrar borgar, kalda stríðsins og loks sameiningar þýsku ríkjanna eftir fall Berlínarmúrsins. Loks er haldið í siglingu um borgina en um Berlín liggja tugir kílómetra af síkjum og kanölum. Margar fallegar brýr eru yfir þær vatnaleiðir og mjög áhugavert er að skoða borgina, byggingar, mannlíf og sögu frá því sjónarhorni.

Heimferðardagur

Leggjum af stað frá hótelinu kl. 11.00 áleiðis á flugvöllinn í Berlín. Brottför flugs Icelandair FI529 til Keflavíkur er kl. 14:05 og lending þar kl. 15:50.