Munchen skoðunarferð

Flogið er með Icelandair FI532 kl. 07:35 til Munchen. Rúta bíður hópsins og farið er í 3 klst. langa skoðunarferð um borgina með áherslu á upphaf ferils Adolfs Hitler og Nasista en þar hélt hann sínar fyrstu ræður árið 1919, árið sem Weimar lýðveldið var stofnað eftir lok fyrri heimstyrjaldarinnar. Í upphafi skoðunarferðar verður staðnæmst á BMW Welt kynningarsvæði bílaframleiðandans.

Að lokinni skoðunarferð um Munchen er innritun á Holiday Inn City Centre 4* hótel þar sem gist verður í tvær nætur. Sameiginlegur kvöldverður er á hinu þekkta Hofbräuhaus veitinga- og brugghúsi í hjarta borgarinnar þar sem Hitler hélt margar ræður á fundum Nasistahreyfingarinnar á þriðja og fjórða áratugnum.

Eagle’s Nest, Arnarhreiðrið

Dagsferð í Eagle’s Nest, Arnarhreiðrið. Kehlsteinhaus eins og húsið var einnig nefnt er bygging sem Nasistar hönnuðu og reistu foringjanum til heiðurs fyrir fimmtugs afmæli hans í apríl 1939 á tindi Kehlstein, klettafjalls sem rís yfir Obersalzberg nálægt bænum Berchtesgaden.

Efsti hluti leiðarinnar er farinn í sérstökum bílum upp að byggingunni og til baka en staðnæmst verður á sögusafni Obersalzberg á leiðinni til baka þar sem fræðast má um söguna og veru nokkurra helstu leiðtoga þriðja ríkisins á svæðinu á valdatíma þeirra. Að því loknu er ekið til baka til Munchen þar sem eftirmiðdagur og kvöldið er frjálst.

Dachau fangabúðirnar, Memorial Concentration Camp safnið og Nürnberg Trial Chamber

Eftir morgunverð og útskráning af hótelinu er haldið af stað til Nürnberg með viðkomu í bænum Dachau þar sem fangabúðirnar og safnið er skoðað, Memorial Concentration Camp.

Búðirnar eru fyrstu fangabúðirnar sem Nazistar settu af stað, opnaðar í mars 1933. Þeim var upphaflega ætlað að vista pólitíska andstæðinga Nazista en urðu síðar að stórum vinnu- og útrýmingarbúðum með allt að 100 hliðar búðum á miklu landsvæði. Að heimsókn lokinni er ekið til Nürnberg og hádegisverður snæddur á leiðinni (ekki innifalinn). Við komu til borgarinnar verður farið í hinn sögufræga réttarsal Nürnberger Trial og safn, þar sem helstu foringjar og áhrifamenn þriðja ríkisins hlutu dóma eftir stríðslok.

Að lokinni heimsókn er haldið á Hotel NH Collection Nürnberg 4* og innritað þar og gist í tvær nætur.

Kvöldið er frjálst. Tilvalið er að skoða gamla bæjarhlutann á gönguleið frá hótelinu upp að kastalavirkinu en við rætur þess er er meðal annars að finna Albrect Dürer haus, safn um þann mikla miðalda listamann. Í miðborginni er fjöldi góðra veitingastaða.

Nürnberg Nazi Party Rallyground

Eftir morgunverð er lagt af stað í skoðunarferð um Nürnberg þar sem meðal annars er staðnæmst á safni og leikvangi Nasistaflokksins, Nürnberg Nazi Party Rallyground. Þar hélt flokkurinn miklar fjöldahátíðir og Adolf Hitler beittar þjóðernis og stríðs hvatningaræður.

Nürnberg skipaði sérstakan sess í viðburðum og áróðri Nazista og varð táknrænn helgistaður þriðja ríkisins af sögulegum ástæðum með vísan til 1000 ára ríkisins og helgigripa þess.

Komið er á hótel eftir hádegi og eftirmiðdagur og kvöld er frjálst.

Mödlareuth

Morgunverður og útskráning af hótelinu og haldið af stað til Berlínar. Eftir léttan hádegisverð (ekki innifalinn) á leiðinni með áningu við Hirschberg er staðnæmst í bænum Mödlareuth og farið í leiðsagða skoðunarferð um svæðið.

Bænum var eins og Berlín skipt upp í tvo hluta á tímum kalda stríðsins og Alþýðulýðveldisins og var hann því oft kallaður Litla Berlín. Komið er til Berlínar síðdegis og hópurinn skráir sig inn á H10 Ku’Damm 4* hótel þar sem gist er í 3 nætur.

Berlín

Að loknum morgunverði er haldið í skoðunarferð um Berlín. Í ferðinni eru staðir sem tengjast valdatíð nasista skoðaðir m.a. Brandenburgar hliðið, minnsvarði um helförina, safn við fyrrum aðalstöðvar Gestapó, ýmsar stjórnarbyggingar, mannvirki og staðir, m.a. Olympíu leikvangurinn þar sem leikarnir voru haldnir 1936. Staðnæmst verður á svæðinu yfir byrgi foringjans þar sem hann framdi sjálfsmorð í stríðslok.

Höfuðborgin Berlín var vettvangur valdatöku Nazista 30. janúar 1933 og falls þriðja ríkisins eftir orustuna um Berlín í apríl og fram til 2. maí 1945. Þar endaði foringinn ævi sína þann 30. apríl 1945 rúmum aldarfjórðungi eftir fyrstu ræðu sína í Munchen og þriðja ríkið var fallið. Hann var þá nýlega orðinn 56 ára gamall.

Sigling um Berlín

Haldið verður í siglingu um síki borgarinnar um morguninn en um Berlín liggja tugir kílómetra af síkjum og kanölum. Margar fallegar brýr eru yfir þær vatnaleiðir og mjög áhugavert er að skoða borgina, byggingar, mannlíf og sögu frá því sjónarhorni.

Þeim sem þess óska er bent á að skoða DDR safnið á eigin vegum. Safn um Alþýðulýðveldi austur Þýskalands sem segir mikla sögu um tíma tvískiptrar borgar, kalda stríðið og loks sameiningu þýsku ríkjanna eftir fall Berlínarmúrsins. Sameiginlegur loka kvöldverður er í Berlín á vel völdum veitingastað um kvöldið.

Heimferðardagur

Lagt af stað frá hótelinu kl. 11.00 áleiðis á flugvöllinn í Berlín. Brottför flugs Icelandair FI529 til Keflavíkur er kl. 14:05 og lending þar er kl. 15:50.