Brottför frá Íslandi

Flogið til Osló með Icelandair kl. 07:50 og lent þar kl. 12:35. Haldið áfram til Dubai með Emirates kl. 14.35 og lent þar kl. 23.25 eftir miðnætti. Þaðan er beint flug til Katmandú kl. 02:10 og lent þar kl. 08:05 þann 24. apríl.

Katmandú

Staðarleiðsögumaður tekur á móti hópnum á flugvell­in­um í Katmandú og fylgir að rútu sem ekur hópnum fyrst á Patan Durbar torg. Durbar torg er hjarta Katmandú og fjölsóttur ferðamannastaður. Þar er einstök þyrping af fornum musterum, talin allt að fimmtíu, hallarbyggingum, hallargörðum og gömlum stræt­um. Sjón er sögu ríkari. Eftir að hafa skoðað okkur um á Patan Durbar torgi verður ekið til heimilis hr. Mishra, þar sem við snæðum ljúffengan hádegisverð. Hr. Mishra er eigandi Tempel Tiger sem annast alla þjónustu fyrir Kólumbus í þessari ferð. Að loknum hádegisverði verður hópnum ekið til innritunar á hótel YAK & YETI þar sem gist er eina nótt. Kvöldverður á hótelinu.

Máltíðir innifaldar: Hádegis- og kvöldverður

Katmandú – Bharatpur/Chitwan

Morgunverður og útritun og eftir það ekið með rútu á innanlandsflugvöllinn við Katmandú. Flogið verður til flugvallarins í Bharatpur en flugið tekur um 20 mín. Við komu á Bharatpur flugvöll verður ekið um gróðursælt sveitalandslag Terai til dvalarstaðarins í Chitwan, Soaltee Westend Resort Chitwan. Eftir innritun og hvíld er boðið upp á hádegisverð á hótelinu þar sem hljóð frumskógarins gefa strax fyrirheit um það sem framundan er.

Farið verður í fróðlega þorpsferð um byggðir frumbyggja í Chitwan.  Tharu-fólkið er frumbyggjaþjóð sem hefur um aldir búið á láglendissvæðum Terai í Nepal. Þau eiga sér ríka menningu, eigið tungumál og sterkar hefðir sem tengjast meðal annars landbúnaði, tónlist og dansi.

Þegar sólin lækkar yfir trjátoppum frumskógarins er komið saman við sundlaugina með tei, kaffi og léttu snarli á meðan fylgst er með sólsetrinu yfir Terai. Í kjölfarið er fræðandi kynning um Chitwan-þjóðgarðinn, vistfræði hans, sögu náttúruvernd, dýralíf og það sem bíður. Kvöldverðarhlaðborð á hótelinu.

Máltíðir innifaldar: Morgun -, hádegis- og kvöldverður.

Heill dagur í Chitwan-þjóðgarði

Snemma morguns, þegar þokan liggur enn yfir ánni og frumskógurinn vaknar til lífs, eru bestu skilyrðin til að fylgjast með villtum dýrum. Dagurinn hefst með kanóferð á Rapti-ánni í gullinni morgunbirtunni. Nashyrningar koma gjarnan niður að vatnsbakkanum til að drekka á þessum tíma og speglast þá útlínur þeirra í kyrru vatninu. Hirtir tipla um í skóginum og fuglasöngur fyllir loftið. Þetta er náttúran í sinni frumstæðustu og fegurstu mynd.

Eftir morgunverð er farið í heimsókn í Gharial Crocodile Breeding Centre. Þetta er mikilvæg verndarstöð sem hefur átt afgerandi þátt í að bjarga gharial-krókódílnum sem er í bráðri útrýmingarhættu, frá útrýmingu. Þar má sjá þessi óvenjulegu, forsögulegu skriðdýr á öllum stigum lífsferilsins, frá viðkvæmum ungum til stórvaxinna fullorðinna dýra og fræðast um verndarverkefni sem hafa smám saman styrkt stofn tegundarinnar.

Síðdegis tekur við hápunktur Chitwan upplifunarinnar: 2–3 klukkustunda jeppasafarí djúpt inn í Chitwan þjóðgarðinn. Opinn jeppinn fer um skóga og víðáttumikil grasaengi sem einkenna landslagið, á meðan reyndur náttúrufræðileiðsögumaður les í frumskóginn af áralangri þekkingu. Í Chitwan lifa meðal annars bengaltígrisdýr, stórir nashyrningar, asískir fílar, hlébarðar, letibirnir, indverskir vísundar, antilópur og yfir 500 skráðar fuglategundir. Því er svæðið eitt besta dýralífssvæði allrar Asíu.

Þegar rökkrið leggst yfir frumskóginn er boðið upp á líflega menningardanssýningu frumbyggja. Deginum lýkur með glæsilegum grillkvöldverði undir berum himni með útsýni beint að frumskóginum. Borðað er undir stjörnubjörtum himni með hljóð næturlífsins í óbyggðunum í bakgrunni. Brak í eldinum, fjarlægt kall næturfugls og ilmur skógarins gera þetta að kvöldverði sem situr eftir í minningunni löngu eftir að bragðið hefur dofnað.

Máltíðir innifaldar: Morgun -, hádegis- og kvöldverður

Chitwan – Katmandú

Snemma morguns er ekið á Bharatpur-flugvöll og flogið til Katmandú. Við komuna til Katmandú verður ekið beint áfram til hinnar fornu borgar Bhaktapur sem er einnig kölluð Bhadgaon eða „Borg hinna trúræknu“. Hún er víða talin besta varðveitta dæmið um miðaldaborg Newari-fólksins í heiminum og er með réttu á heimsminjaskrá UNESCO.

Á hinu glæsilega Bhaktapur Durbar Square stendur hin goðsagnakennda 55 glugga höll, með grindarverki úr tré sem er afrek Newari-handverks og hefur veitt arkitektum og listamönnum innblástur í aldaraðir. Hádegisverður er á veitingastað í Bhaktapur og síðdegið svo frjálst í Bhaktapur. Kvöldverður er á veitingastað í Katmandú að lokinni heimferð og innritun á Yak & Yeti Hotel.

Máltíðir innifaldar: Morgun -, hádegis- og kvöldverður

Skoðunarferð allan daginn um Katmandú

Morgunverður á hótelinu og síðan er farið í skoðunarferð um borgina og til Swayambhunath stúpunnar. Stór hvít stúpan er krýnd alsjáandi augum hins frumstæða Búdda sem horfa rólega í allar fjórar höfuðáttir frá hæðinni yfir dalnum. Katmandú var aðsetur konungsætt­arinnar fram á 20. öld. Durbar torg er hjarta borgarinnar og fjölsóttur ferðamannastaður. Þar er einstök þyrping af fornum musterum, talin allt að fimmtíu, hallarbyggingum, hallargörðum og gömlum strætum.

Fyrir þá sem vilja kynnast raunverulegu daglegu lífi í Katmandú er leiðsögn um iðandi markaði miðborgarinnar nauðsynleg. Svæði á borð við Ason Bazaar, Indra Chowk og sögulegar götur Makhan Tole eru miðstöðvar hefðbundinna viðskipta þar sem heimamenn kaupa og selja ferskt grænmeti og ávexti, krydd, koparvörur, textíl og ýmsa handgerða muni.

Gestir geta valið á milli þægilegrar rikshaw-ferðar, sem er bæði skemmtileg og hentug fyrir eldri ferðalanga, eða stuttrar 30-45 mínútna göngu með leiðsögn á rólegum hraða. Þetta hentar sérstaklega þeim sem vilja kynnast menningu heimamanna og skilja betur daglegt líf íbúa Katmandú.

Hádegisverður á veitingastað. Síðan er farið aftur á hótelið og frjáls tími.

Um kvöldið er hefðbundinn nepalskur kvöldverður með menningardagskrá á veitingastað í borginni.

Máltíðir innifaldar: Morgun -, hádegis- og kvöldverður

–––––––––––––

VALKVÆTT  og ekki innifalið í verði ferðarinnar, útsýnisflug yfir Everest: US$ 270,00 á mann.

Verðið felur í sér allar ferðir til og frá flugvelli og flugvallarskatta. Verð getur breyst án fyrirvara ef flugfélög endurskoða gjaldskrá.

Eitt af því sem verður að sjá í Nepal er að sjálfsögðu hæsti tindur heims, Everest. Fátt jafnast á við þá lotningarfullu kyrrð sem fylgir því að fljúga til móts við hæstu fjöll jarðar. Fjallaflugið veitir víðáttumikið útsýni yfir Himalajafjöllin á aðeins einni klukkustund. Jafnvel ferðalangar sem kunna vel við erfiðar göngur ættu ekki að láta tækifærið fram hjá sér fara til að „sigra“ fjöllin í einni ferð. Þetta klukkustundarflug liggur yfir austurhluta Himalajafjalla í Nepal og sýnir nokkra hæstu tinda heims, þar á meðal Everest. Upplifunin er einstök þegar ferðalangar standa nánast augliti til auglitis við hæstu og dularfyllstu fjöll jarðar.

Katmandú – Paró með flugi og akstur til Timfú

Morgunverður á hótelinu í Katmandú. Að því búnu er haldið út á flugvöll og flogið til bæjarins Paró í Bútan. Flugleiðin liggur yfir stórbrotið fjalllendi og opnast sýn til hæstu tinda í Himalæjafjallgarð­inum, Everest, Kanchen­junga og Makalu. Þegar nær dregur áfangastað, Paró, birtast snævi þaktir tindar í Bútan, hinn helgi Jhomolhari, Jichu Drake og Tserimgang.

Staðarleiðsögumaður tekur á móti farþegum á flugvellinum í Paró og þaðan er ekið eftir fallegri leið til höfuðborgar Bútan, Timfú. Innritun á Hotel Druk þegar komið er til Timfú. Timfú, höfuð­borg Bútans og aðsetur stjórnvalda og miðstöð trúariðk­unar og viðskiptalífs, er einstök borg þar sem mætast nútími og fornar hefðir. Trúlega er þetta eina höfuðborg í veröldinni þar sem eru ekki umferðarljós. Eftir kom­una á hótelið er dagurinn frjáls en má mæla með gönguferð um þessa líflegu borg. Ef tími gefst til er vel þess virði að heimsækja Trashicho Dzong-virkið þar sem er hásætissalur konungs og ýmis ráðuneyti og stjórnarskrifstofur.

Máltíðir innifaldar: Morgunverður.

Timfúdalur

Eftir morgunverð á hótelinu notum við daginn til þess að skoða okkur um í Timfú og í Timfúdal. Við heimsækjum m.a. eftirtalda staði:

Buddha Dordenma, 51,5 metra há Búddhastytta á hæð með einstöku útsýni yfir höfuðborgina.

Gagyel Lhundrup vefnaðarsetrið, víðfrægt vefnaðarsetur sem er í eigu og undir stjórn karlmanns sem er óvenjulegt í Bútan.

Minningarstúpan Chorten, minnismerki helgað heimsfriði og Jigme Dorji Wangchuck, konungi, sem nefndur er „faðir hins nýja Bútans“.

Changangkha Lhakhang, eitt af hinum æfagömlu musterum í Timfú. Úr klausturgarðinum er hrífandi útsýni yfir Timfúdalinn.

 Zorig Chusum, lista- og handiðnaskóli sem býður sex ára nám í 13 hefðbundnum lista- og handiðnagreinum.

Veflistasafnið, sett á stofn árið 2001.

Aldargamli bændamarkaðurinn, líflegur og litríkur staður þar sem bændur víðsvegar af landinu selja afurðir sínar.

Kvöldið er frjálst og ferðalöngum gefst tækifæri til að skoða t.d. versl­unarmiðstöð með handiðnavörur, sem rekin er af ríkinu, og markað bæjarbúa með hvers konar handiðnavörur frá heimamönnum.

Máltíðir innifaldar: Morgunverður

Timfú – Paró

Eftir morgunverð er ekið til Paró. Á leiðinni er höfð viðdvöl í Simtokha Dzong, einu af elstu klausturvirkjunum í Bútan. Í klausturvirkinu er nú rekinn skóli og fræðasetur, helgað þjóðtungu Bútana, dzngkha. Ferð­inni er svo haldið áfram og komið í Paródal, fallegan dal sem umlykur blóm­lega menningu og þar sem ótal helgisagnir og þjóðsögur eiga sér rætur. Í dalnum eru mörg af elstu musterum og klaustrum í Bútan og þar er eini flugvöllurinn í landinu.

Tindurinn Jhomolhari (7.300 m) gnæfir í snævi þaktri dýrð sinni yfir dalbotninum í norðri og frá honum, í djúpu gljúfri, streymir jökul­fljótið Pa Chu (Paró-fljót). Í Paró dal er eitthvert frjósam­asta ræktarland í Bútan og þar er ræktað á stallaökrum megnið af hinum frægu rauðu hrísgrjónum frá Bútan. Eftir innritun á Dawa at Hilltop by Heeton heim­sækjum við Ta Dzong, sem var upphaflega reist sem varðturn en hýsir nú Þjóðminjasafnið.

Eftir heimsókn á safnið er tilvalið að staldra við í Rinpung Dzong, „virki skargripahrúgunnar“, stað sem á sér langa og heillandi sögu. Þá er vel þess virði að líta inn í Kyichu Lhakhang, eitt af elstu musterum í Bútan.

Máltíðir innifaldar: Morgunverður.

Tígrishreiðrið – Taktsang

Tígrishreiðrið, frægasta búddhaklaustrið í Bútan, er á stórbrotnum stað, svo ekki sé fastar að orði kveðið, þar sem það stendur utan í hamra­vegg 900 metrum ofan við dalbotninn. Sagan segir að á 8. öld hafi Gúrú Rin­poche flogið á baki tígrislæðu frá austanverðu Bútan á þennan stað þar sem hann hugleiddi í helli í þrjá mánuði. Þess vegna er klaustrið nefnt „Tígrishreiðrið“. Höfuðmusterið í klaustrinu var reist árið 1692. Aðal­byggingin skemmdist illa í eldi árið 1998 en eftir endursmíði og um­bætur í mörg ár stendur klaustrið nú endurgert í allri sinni dýrð.

Pílagrímsferð til Taktsang er draumur allra heittrúaðra Bútana.

Hægt er að leigja smáhesta (viðbótargjald) sem bera ferðalanga frá dalbotninum til svæðis sem nefnt er annað útsýnissvæðið. Þröngur stígurinn ofan við þetta svæði hentar ekki fyrir smáhesta en efsti hluti stígsins eru steinsteyptar tröppur. Gangan frá öðru útsýnissvæði til musterisins tekur um hálfa til eina klukkustund. Ferðalangar verða að ganga alla leiðina niður frá klaustrinu (smáhestar eru ekki til reiðu á niðurleiðinni).

Máltíðir innifaldar: Morgunverður.

Paró – Katmandú

Vaknað er fyrir dögun til að njóta síðasta morgunsins í Bútan áður en ekið er á Paró flugvöll fyrir flug til Katmandú. Við komu til Katmandú er farið í skoðunarferð að Pashupatinath hofinu, helgasta hindúahofi Nepals, helguðu Shiva sem Drottni allra lifandi vera. Frá Pashupatinath er haldið að Boudhanath stúpunni í lokahringgöngu um hina miklu mandölu. Í gullinni síðdegisbirtunni glóir hvítkölkuð hvelfingin hlýlega máluð, augu Búdda horfa yfir svæðið í kyrrlátri alvitund og loftið fyllist ómi bæna sem virðist ekki koma frá einstökum röddum heldur jörðinni sjálfri. Hádegisverður er á veitingastað í Boudhanath þar sem matargerð með tíbetskum áhrifum endurspeglar samfélagið sem hefur safnast þar saman kynslóð eftir kynslóð. Gist er á The Soaltee Kathmandu.

Um kvöldið er glæsilegur kveðjukvöldverður á Soaltee Kathmandu. Þar lyftum við glasi fyrir ógleymanlegri ferð um Nepal og Bútan – lönd stórbrotinna fjalla, kyrrlátra klaustra, gróskumikilla frumskóga og gjöfulla áa, en umfram allt einstakrar menningar og fólks.

Máltíðir innifaldar: Morgun-, hádegis- og kvöldverður.

Frjáls dagur í Katmandú og haldið heim á leið

Dagurinn er frjáls í Katmandú. Hægt er að njóta eigin tíma, sinna síðustu innkaupum eða einfaldlega hvíla sig fyrir heimferðina.

Staðarleiðsögumaður fylgir hópnum á alþjóðaflugvöllinn í Katmandú síðdegis og síðan er brottför með Emirates kl. 00:35 (5. maí) áleiðis til Osló með viðkomu í Dubai þar sem lent verður kl. 03:45.

Máltíðir innifaldar: Morgunverður.

Dubai – Osló – Keflavík

Haldið er áfram frá Dubai kl. 07:30 að morgni og lent í Osló kl. 12:35. Haldið áfram til Keflavíkur með Icelandair kl. 13:50 og lent þar kl. 14:45.

Þar með lýkur þessari glæsilegu ferð um Nepal og Bútan.