Brottför frá Íslandi

Flogið með FI500 til Amsterdam kl. 07:40, lent þar 11:55. Upplagt að nýta daginn og skreppa inn í borg en flugið okkar með KLM, KL 807 Amsterdam-Manila er kl. 20:05. Töskur innritaðar alla leið til Manila í Keflavík svo ekki þarf að hafa áhyggjur af þeim ef fólk fer út úr Schiphol flugstöðinni yfir daginn.

Manila

Lent í Manila kl. 19:30 að staðartíma en tímamismunur er 8 klst. Ökum beinustu leið á hótelið okkar, Seda Residences Makati þar sem við tékkum inn og fáum langþráða hvíld.

Makati hverfið og skoðunarferð um höfuðborg Manila

Við tökum því rólega um morguninn, kíkjum í sundlaugargarðinn eða göngutúr um næsta nágrenni við hótelið. Makati hverfið er helsta viðskiptahverfi Manila og mikið úrval verslana og veitingastaða allt um kring.

Eftir hádegi höldum við síðan í skoðunarferð um höfuðborg Filippseyja, Manila með enskumælandi staðarleiðsögumanni.  Við ökum um Makati hverfið, förum í Manila American Cemetery og safnið þar og höldum síðan í miðborgina í elsta og sögufrægasta borgarhlutann, Intramuros. Skoðum  þar Fort Santiago, San Agustin kirkjuna sem er á Heimsminjaskrá UNESCO og heimsækjum Casa Manila,  ríkra manna hús frá spænska nýlendutímanum. Ferðinni ljúkum við síðan með sameiginlegum kvöldverði á Barbara‘s Heritage Restaurant þar sem við eigum góða stund saman yfir mat og tónlist heimamanna.

Panglao eyjan við Bohol

Um hádegisbil yfirgefum við hótelið okkar og höldum út á flugvöll þar sem við tökum innanlandsflug kl. 15:20 Manila-Bohol. Við lendum á Tagbilaran flugvelli kl. 17:00 og ökum stutta leið á fallega hótelið okkar, The Bellevue Resort, 5- stjörnu hótel sem stendur við ströndina á Panglao Island við Bohol.

Frjáls eftirmiðdagur og kvöld.

Bohol – Chocolate Hills – Loboc áin

Við tökum daginn snemma og höldum í afar fjölbreytta skoðunarferð um hina yndislegu Bohol eyju með skemmtilegum staðarleiðsögumanni. 

Meðal þess sem við fáum að kynnast er friðland hinna sjaldgæfu Tarsier dýra, kíkjum í áhugaverðar kaþólskar kirkjur og hlustum á Gospel tónlist ef við erum heppin.

Skoðum magnaða náttúrufyrirbærið Chocolate Hills og snæðum hádegisverð um borð í fljótabáti á Loboc River. Góður matur og skemmtileg tónlist í bland við magnaðan regnskóginn.

Frjálst kvöld.

El Nido

Við tökum því rólega um morguninn og njótum fyrirtaks aðstöðu á hótelinu.

Yfirgefum hótelið okkar um hádegi og eigum flug kl. 15:40 frá Bohol og vestur yfir Sulu hafið beint til litla bæjarins El Nido á norðurhluta Palawan eyju. El Nido er einn af vinsælustu áfangastöðum erlendra ferðamanna á Filippseyjum. Hótelið okkar Seda Lio El Nido stendur við ströndina steinsnar frá flugvellinum.

Frjáls eftirmiðdagur og kvöld.

Frjáls dagur og kvöld í El Nido

Glæsilegur sundlaugargarðurinn og ströndin fyrir framan hótelið munu sannarlega freista margra. Síðan er auðvelt að taka TukTuk (leigubíl) inn í litla miðbæinn, kíkja í búðir og á veitingastaði.

Eyjahopp

Eftir morgunverð setjum við á okkur sólgleraugun og nóg af sólarvörn því dagurinn fer í svokallað „Eyjahopp“.  Við siglum milli fallegra eyja og voga þar sem við njótum náttúrufegurðarinnar og góðs félagsskapar fram eftir degi.

Kvöldið frjálst.

Palawan eyja – Sabang

Við tökum daginn snemma, útritum okkur af Seda Lio hótelinu og ökum suður Palawan eyju í gegnum sígræna regnskógana og fjölbreytt landslag. Ferðin tekur 5 – 6 klst með stuttum stoppum. Við komum til strandbæjarins Sabang í eftirmiðdaginn og innritum okkur á Four Points by Sheraton hótelið þar sem við munum dvelja næstu tvær nætur. 
Hótelið er glæsilegt með fallegum sundlaugagarði, frábærri strönd og í stuttu göngufæri frá litla miðbænum í Sabang.

Puerto Princesa Underaground River

Eftir morgunverð gerum við okkur klár í ævintýralega heimsókn í Puerto Princesa Underground River. Ferðin hefst með stuttri siglingu frá miðbæ Sabang á svokölluðum „Banka“ bátum yfir í þjóðgarðinn við neðanjarðarána. Þar skiptum við yfir í litla árabáta með leiðsögumönnum sem taka okkur inn í þessa undraveröld sem er á Heimsminjaskrá UNESCO og eitt af „Nýju 7 náttúruundrum veraldar“ (New 7 Wonders of Nature). Áin er alls um 8,2km löng inn í kalksteinsfjöllin en við förum um einn fjórða af þeirri vegalengd. Þarna upplifum við einstaka undraveröld.

Þegar við komum aftur til Sabang förum við á skemmtilegan veitingastað og fáum okkur sameiginlegan hádegisverð sem er innifalinn.

Eftirmiðdagur og kvöldið frjálst.

Boracay

Við vöknum eldsnemma, útritum okkur af hótelinu og ökum út á flugvöllinn í Puerto Princesa sem er í um eins og hálfs tíma fjarlægð. Þar tökum við innanlandsflug til Boracay en með millilendingu í Manila þar sem við skiptum um flugvél.

Áætluð koma til Caticlan Airport (Boracay) er kl. 11:30. Við höldum niður að höfn, tökum bát yfir á Boracay eyjuna sjálfa og síðan er ekið að hótelinu okkar, Mövenpick Resort & Spa Boracay.

Frjáls eftirmiðdagur og kvöld.

Frjáls dagur

Dagurinn er frjáls til að njóta lystisemda lífsins, hvort sem sundlaugargarðurinn verður fyrir valinu, einkaströndin, nudd eða fyrsta flokks veitingar og dekur á einhverjum þriggja veitingastaðanna eða strandbarnum  – allt í einstaklega fallegu umhverfi og með þjónustulunduðu starfsfólki.

Skemmtisigling og kveðjukvöldverður

Eftir morgunverð njótum við saman þessa síðasta dags okkar á Filippseyjum og förum í skemmtisiglingu með ströndum Boracay. Við kíkjum á Puka Beach sem er falleg strönd fjarri mannabústöðum, snorklum (fyrir þá sem vilja skoða litríkt sjávarlíf og fagurt kóralrif) við Coral Garden og fáum okkur hádegisverð í landi sem er innifalinn. Semsagt góður dagur í sól og sælu.

Um kvöldið er sameiginlegur kveðjukvöldverður fyrir hópinn á ítalska veitingastaðnum BREZZA sem er í hótelinu okkar.

Flogið til Amsterdam

Við yfirgefum Mövenpick hótelið um hádegi, komum okkur aftur út á Caticlan Airport og tökum flug til Manila kl. 15:10. Lendum þar kl. 16:25 og eigum síðan flug með KLM til Amsterdam kl. 20:45.

Frjáls dagur í Amsterdam

Áætluð lending í Amsterdam er kl. 08:15.

Við tökum kærkomna hvíld í Amsterdam á Mövenpick Amsterdam City Centre hótelinu í miðborginni.

Dagur og kvöld frjálst.

Heimfarardagur

Við eigum frítíma í Amsterdam fram eftir degi en ökum út á Schiphol flugvöll síðdegis og fljúgum heim með Icelandair FI 505 kl. 20:20. Áætluð lending í Keflavík kl. 22:50.