Brottför frá Íslandi 

Flogið er með Icelandair FI318 til Osló kl. 07:50 og lent kl. 11:35. Bið eftir framhaldsflugi er aðeins eins ein klst. og 45 mín. áður en haldið er áfram með flugfélaginu Thai Airways áleiðis til Bangkok þar sem lent verður kl. 06:20 að staðartíma. Áfram er síðan flogið til Hanoi kl. 07:45 og lent í Hanoi kl. 09:35 að staðartíma.

Komið til Hanoi

Xin chao! Velkomin til Hanoi. Staðarleiðsögumaður tekur á móti hópn­um á Noi Bai alþjóðaflugvellinum og síðan er ekið með rútu á The Ann Hanoi hótelið þar sem gist verður fyrstu tvær næturnar í Víetnam. Tími til að hvílast eftir langt flug en dagurinn annars frjáls fram að kvöldi. Kvöldverður á veitingastað í miðborginni.

Upplifun í Hanoi

Eftir morgunverð byrjum við daginn á að skoða mannlífið í gamla bæn­um og heimsækja Bókmenntahofið, helgað Konfúsíusi, umfangsmikið svæði þar sem einstök byggingarlist allt frá 11. öld og menningararfleifð Víetnama njóta sín til fullnustu. Síðdegis göngum við inn á Ho Chi Minh svæðið.

Við förum að hinu mikilfenglega grafhýsi Ho Chi Minh og röltum um blómskrýdda garðana við Forsetahöllina þar sem má sjá m.a. Pagóðuna á einni súlu og stólpahús Ho Chi Minh. Við setjumst svo upp í raf­knúna bíla og bregðum okkur í ökuferð um litrík og erilsöm stræti gamla borgarhlutans í Hanoi. Andið að ykkur gjörólíkum blæbrigðum á mannlífi í borginni og njótið hennar með opnum huga.

Eftir ökuferðina tyllum við okkur niður á einum af flottustu börum (Roof-top bar) borgarinnar þar sem við fáum okkur kokteila (innifalið) og horf­um á sólarlagið með útsýni yfir elstu borgarhverfin og tvö af helstu stöðu­vötn­unum í borginni. Snæðum síðan gómsætan víetnamskan kvöldverð.

Hanoi – Ninh Binh

Við ökum í suðaustur um Ninh Binh héraðið sem oft er nefnt „Halong flói á þurru landi“. Við snæðum hádeg­isverð á skemmtilegum stað hjá fjölskyldu með sveitagistingu og njótum frábærrar gestrisni eigenda.

Síðdegis förum við í ævintýralega siglingu með sampan-bátum um hríf­andi landsvæði Tam Coc, dalsins sem er þekktur fyrir himingnæfandi kalksteinskletta og fallegar hrísgrjónaekrur. Við heimsækjum Bich Dong pagóðuna sem er á þremur hæðum utan í klettahlíð með góðu útsýni yfir svæðið frá efstu hæðinni. Gist er á Emeralda Resort Tam Coc í Ninh Binh.

Sameiginlegur kvöldverður á veitingastað.

Ninh Binh – Halongflói

Í dag ökum við yfir óseyrar Rauðafljóts og komum niður á strönd rétt fyrir hádegi.

Við förum um borð í fallegt skip, þar sem við eigum framundan sólarhringssiglingu um Halongflóa, haf­svæði sem þykir einstakt fyrir náttúrufegurð. Strax og lagt verður frá landi snæðum við ljúffengan hádegisverð þar sem sjávarfang er uppi­staðan í réttunum og kalksteinsklettar eru til skrauts við matborðið. Síðdegis verður siglt um fáfarnari slóðir í flóanum og við slökum á, förum í sólbað á lítilli strönd eða róum á kajak. Dagskráin getur breyst og fer það eftir veðri. Við ljúkum deginum með því að njóta sólarlagsins af þilfarinu. Gestir geta valið á milli þess að gæða sér á fordrykk og/eða fá stutt matreiðslunámskeið fyrir kvöldverð. Gist um nóttina í notalegum sérklefa með baðherbergi á Alisa Premier Cruises.    

Athugið:
– Siglingaleið og -áætlun geta breyst vegna veðurs, sjávarfalla eða annarra aðstæðna á hafinu. Ef veður er slæmt er ekki heimilt að synda í sjónum eða stunda kajakaróður.

Halongflói – Hanoi – Flogið til Hue

Einhver eftirminnilegasta upplifun ferðamanna í Víetnam er að fylgjast með sólarupprás yfir Halongflóa. Farið á fætur eldsnemma og förum öll í  Tai Chi leikfimi til að liðka okkur og njótum þess­ar­ar hrífandi og friðsælu stundar.

Eftir morgunverð höldum við áfram að sigla um flóann og heimsækjum Sung Sot hellinn, einstaka og stór­brotna náttúrusmíð úr kalksteini sem geymir einnig æfafornar mann­vistarleifar. Við snæðum léttan hádegisverð um borð og leggjum að höfn rétt fyrir hádegi. Þegar við komum í land heimsækjum  við stóran perluframleiðanda og fáum að kynnast aðferðum þeirra við framleiðsluna.

Ekið til flug­vallarins í Hanoi og flogið til Hue, litríkrar menn­ingarborgar í Mið-Víetnam. Nýr staðarleiðsögumaður tekur á móti hópnum á flug­vellinum og ekið á hótel. Gist er í 2 nætur á Senna Hue Hotel.

Kvöldverður á hótelinu.

Skoðunarferð um Hue

Við leggjum af stað frá hótelinu eftir morgunverð og heimsækjum fornu Keisara­borg­ina í Hue, rústir af gríðarmiklu borgarvirki. Hér má sjá hvernig eyðingar­máttur tímans og heiftarleg stríðsátök hafa leikið það sem áður var listi­lega hönnuð höfuðborg Nguyen-keisaraættarinnar. Við heyrum mergjaðar og oft ótrúlegar sögur af lífsstíl keisaranna og skoðum einnig grafhýsi Tu Duc keisara (1829-1883). Að því búnu snæðum við há­degisverð á veitingastað í grenndinni.

Eftir hádegi heimsækjum við Thuy Bieu, friðsælt og sjarmerandi sveitaþorp þar sem tíminn líður aðeins hægar en við eigum að venjast. Komum aftur á hótelið síðdegis þar sem tilvalið er að skella sér í nudd eða einhverja af þeim slökunar- og dekurmeðferðum sem í boði eru.

Kvöldverður í miðbænum.

Hue – Lang Co – Hoi An

Við leggjum af stað eftir morgunverð og ökum í suðurátt til gömlu hafnarborgarinnar Hoi An. Við nemum staðar við Dam Chuon lónið, en margir eiga hér leið um en fáir staldra við. Við höfum annan háttinn á og bregðum okkur í stutta bátsferð um lónið í fylgd fiskimanna til að kynnast veiðiaðferðum þeirra. Hádegismatur er borinn fram í einfaldri bygg­ingu á stólpum úti á lóninu, ferskt sjávarfang sem landað var þá um morguninn.

– Við höldum áfram á ferð okkar í suður, gerum stutt stopp við hinn fagra Lang Co flóa og ökum síðan yfir Hai Van skarð þaðan sem er stór­fenglegt útsýni yfir hafið og gylltar strendur. Við ökum gegnum Danang borg og komum síð­degis til Cam Thanh á óshólmum Thu Bon fljóts, í útjaðri Hoi An, svæðis sem er þéttvaxið kókospálmaskógi. Við stökkvum um borð í bát á fljótinu og njótum sólarlagsins á siglingu okkar inn til miðborgarinnar þar sem kveikt er á luktum þegar dimmir og líf færist á fljótsbakkana.

Gist er á Hadana Boutique Resort næstu 2 nætur. Sameiginlegur kvöldverður á spennandi veitingastað.

Hoi An – frjáls dagur

Frjáls dagur sem má nota til þess að rölta um þessa fornu hafnarborg, kíkja í verslanir og á markaðinn, fara á ströndina, rölta milli kaffi- og veitingahúsa eða bregða sér í hjólatúr, en á hótelinu eru ókeypis reiðhjól til afnota fyrir gesti.

Hoi An er líka þekkt fyrir mikið úrval góðra klæðskera og því tilvalið að láta sauma eitthvað fallegt á sig ef svo ber undir. Fararstjórar okkar aðstoða við slíkt. Spa deildin á Hadana veitir líka frábæra þjónustu gegn vægu gjaldi fyrir þá sem vilja láta dekra við sig.

Kvöldið er frjálst.

Hoi An – Danang – Saigon (Ho Chi Minh City)

Eftir morgunverð ökum við til Danang flugvallar til að ná flugi til Saigon um hádegisbil. Við komu til Saigon hittum við þriðja staðarleiðsögumann okkar og ökum á hótel í miðborginni.

Eftir hádegisverð förum við í gönguferð um miðborgina og skoðum m.a. stríðsminjasafnið (The War Remnants Museum) auk helstu kennileita Ho Chi Minh-borgar.

Gist er á Northern Charm Hotel næstu 2 nætur.

Kvöldverður í miðborginni.

Saigon – óshólmar Mekong – Saigon

Við leggjum af stað snemma dags út úr Saigon og komum að víðáttumiklum óseyrum Mekong-fljóts eftir u.þ.b.tveggja og hálfs tíma akstur. Við höldum okkur frá fjölsóttum ferðamannastöðum og förum til bæjarins Sadec. Þetta er  lítill bær með bátasíkjum, þröngum götum og blómaökrum.

Við stígum um borð í einkaferju á fljótinu og snæðum hádegisverð á meðan við líðum áfram eftir Mekong. Við komum við á svæði nærri Cai Be sem er ekki ýkja fjölsótt af ferðamönnum. Hér gefst tækifæri til að hitta heimamenn, fræðast um handiðnir og elda­mensku og njóta lita og ilms regnskógarins.

Við komum síðdegis aftur til Saigon og njótum kvöldsins á fallegum veitingastað.

Saigon – Mui Ne 

Undir hádegi ökum við frá Saigon til Mui Ne í Binh Thuan héraði, sem er einn af fegurstu strandbæjunum Suður-Víetnam við Suður-Kínahaf. Eftir innritun á hótelið er öllum frjálst að slaka á, hverjum eftir sínu höfði. Gist á 5-stjörnu The Anam Mui Ne næstu 2 nætur. K

völdið er frjálst.

Mui Ne – frjáls dagur

Njótið lífsins eins og ykkur best lystir. Farið í sólbað á ströndinni, takið sundsprett í blágrænum sjónum, slakið á í hótelgarðinum eða spilið golf, fáið lánað hjól á hótelinu, skellið ykkur í nudd og dekur eða skellið ykkur á sjódrekanámskeið (Kite surfing). Allt þetta er hægt að gera á staðnum.

Kvöldið er frjálst en fararstjóri hóar hópnum saman ef áhugi er á sameiginlegum kvöldverði á spennandi veitingastað.

Mui Ne – Saigon – brottför

Upp úr hádegi kveðjum við Mui Ne, þessa hitabeltispara­dís, og ökum á alþjóða­flugvöllinn í Saigon þar sem innritun fer fram í flug Thai Airways með brottför kl. 20:10 til Bangkok þar sem lent verður kl. 21:35.

Dubai – Osló

Brottför flugs Bangkok til Osló er kl. 00:05 og lent í Osló kl. 07:05.  Rúta bíður hópsins og ekur áleiðis á hið vel staðsetta Clarion Hotel the Hub þar sem gist verður í eina nótt.

Osló – Keflavík

Rúta ekur hópnum kl. 10:30 á Gaardermoen-flugvöll þar sem innritun fer fram í flug Icelandair FI319 kl. 13:10. Lent í Keflavík kl. 15:20 að staðartíma. 

Þar með er komið að lokum þessarar ævintýraferðar til Víetnam.